Impamvu zishobora gutuma abantu batakwiyumvamo

Hari abantu usanga bishimirwa ndetse bagakundwa n’ingeri zose, hari n’abandi ariko usanga batishimirwa na rimwe. Kwangwa cyangwa kutishimirwa bishobora guturuka ku ishyari abantu bagufitiye bitewe n’ibyiza umaze kugeraho, hari n’igihe ariko ushobora kwangwa ari wowe biturutseho.





Urubuga elcrema rwagaragaje bimwe mu bikorwa bishobora gutuma wangwa n’abantu.

1. Iteka ubona ibintu byose ari bibi
Burya abantu bakururwa n’ibyiza, umuntu rero uhora iteka abona ibintu byose ari bibi (negative minded people) ntashobora gukundwa cyangwa ngo yishimirwe, kuko ntacyo aba afite ageza ku bandi uretse ibibi.
N’iyo uyu umuntu akunzwe akundwa n’uwo bahuje imico.

2. Uhora uzinze umunya
Burya abantu benshi bakunda gukururwa n’inseko kuko inseko igaragaza ubwiza ndetse igatuma abantu bakubonamo ibyiza, bikanongera icyizere bakugiriraga. 
Niba rero uri wa muntu uhora azinze umunya biragoye ko ukundwa cyangwa ngo wishimirwe n’abantu, kuko bizatuma iteka bakubonamo ibibi kandi ntawifuza kujya ahari ibibi.

3. Urakabya
Umuntu wese agira imico myiza n’ingeso mbi zishobora gutuma yangwa, burya ariko ikintu cyose kirengeje urugero kiba kibi.
Ya mico myiza yawe niramuka igeze ku rwego rukabije bishobora gutuma abantu bakwanga, kuko bashobora no gukeka ko hari ikindi uba ugamije cyangwa ari uburyarya.

4. Uhora ushaka ko abantu bakwitaho
Umuntu uhora ashaka ko abantu bamwitaho usanga atishimirwa n’abantu kuko akenshi nta kintu na kimwe akora kimuvuye ku mutima.
Umuntu uhora iteka ashaka abantu bamwitaho, usanga agerageza kwishushanya kugira ngo agaragare neza mu maso y’abantu kandi mu mutima atari ko bimeze.

5. Urikunda/wihugiraho
Burya umuntu wikunda iteka usanga akurura yishyira, ibi rero ntibishobora gutuma ukundwa keretse gusa ufite imico myiza nubwo bibaho gake cyane.
Kwikunda no kwihugiraho bituma iteka wishyira imbere bikaba intandaro yo guhungwa n’abantu ndetse ukagenda utakaza nyinshi mu nshuti zawe.

6. Nta muntu wubaha
Kutubaha abantu ni kimwe mu bintu bishobora gutuma utishimirwa na gato n’abo mubana cyangwa muhuye. Nta muntu ushobora kwishimira kubana n’umuntu utubaha abandi.
Kutubaha abandi bituma iteka bakubonamo ibibi kuko ari yo shusho uba utanga.

Niba ufite umwe muri iyi mico twavuze, gerageza kuyihindura kuko n’iyo waba ukunzwe uyu munsi ejo ishobora gutuma abantu batangira kugenda bakuvaho.




Chief Editor
Writer and Editor at IwacuMag.
Yisangize abandi:

Ibitekerezo byatanzwe:

Chief Editor

Chief Editor

Writer and Editor at IwacuMag.

You May Also Like