Abashakashatsi bahishuye ibanga ryafasha abantu kurama imyaka isaga 100

Buri wese yifuza kubaho neza mu buzima buzira indwara n’ibindi bibazo karande bishobora gukoma mu nkokora ibyifuzo bye byo kuramba by’igihe kirekire nka ba sogokuruza bo hambere.




 Imibereho y’ubuzima bwa none n’uburyo abantu bahihibikana babushaka biri mu biza ku isonga mu bituma imyaka abantu bamara ku isi igabanuka ubutitsa.

Abashakashatsi nk’abantu bahorana amatsiko yo gucukumbura no gutunga agatoki ibibazo byugarije isi n’uburyo byashakirwa umuti bagaragaje inzira umuntu yanyura ikamufasha kumara imyaka myinshi ku isi.

Ubu bushakashatsi bwakorewe muri Ecosse muri Kaminuza ya Edinburgh iri mu zikomeye ku isi, bugamije kureba uburyo umuntu ashobora kugeza mu myaka ijana ndetse agasaza neza agifite ubuzima bwiza.

Ikinyamakuru Top Santé cyanyujijwemo ubu bushakashatsi nyuma y’izindi nyigo 25 zakorewe muri Australia, u Burayi no muri Amerika y’Amajyaruguru ku bantu 606 000.



Mu isuzuma ryakozwe abantu bashyizwe mu matsinda bategekwa ibyo bagomba kwigomwa harebwa niba byakongera icyizere cyabo cyo kubaho. Mu bisubizo byagaragaye, abashakashatsi basanze igishobora gufasha abantu gusaza bagejeje ku myaka 100 kwirinda kunywa itabi no guhungira kure umwuka waryo.

Ibi babishimangiye bagaragaza ko umuntu unywa imiti y’itabi 20 ku munsi agabanya icyizere cyo kubaho ho imyaka irindwi. Iyo umuntu afashe icyemezo cyo kurireka ashobora kugenda agaruza iyo myaka.

Ibindi bagaragaje umuntu agomba kwirinda ni uguha ikaze indwara zifatwa nka karande zirimo diyabete, ibinure biba mu mubiri (cholesterol), umutima, umubyibuho ukabije n’izindi.

Umuntu ufite izi ndwara agenda yikandagira kuko amenya ko afite ikibazo gikomeye kitatuma atekana, imwe mu mpamvu zituma yumva yihebye n’icyizere cyo kubaho kigakendera buhoro buhoro.

Aba bahanga bagaragaza ko igihe ibiro by’umuntu bitajyanye n’uburebure bwe, burya aba yamaze gutakaza amezi arindwi ku gihe yagombaga kumara ku isi, mu gihe iyo ugabanutseho ikiro kimwe uba wiyongereye amezi abiri yo kubaho.

Ikindi gisa nkaho gitangaje mu bushakashatsi bwabo, ni uko basanze nyuma yo kurangiza amashuri ya kaminuza, buri mwaka wose umuntu arengejeho mu kwiga awugiramo icyizere cyo kubaho kingana n’amezi 11.

Abahanga mu by’ubuzima batanga inama ko umuntu agomba gukora siporo nibura mu gihe cy’iminota 10 buri munsi kuko bituma aca ukubiri n’indwara za hato na hato zashoboraga gukoma mu nkokora igihe yari kumara ku isi.

Izi ngingo zose ziyongeraho ibishobora guterwa n’uruhererekane rw’umuryango umuntu akomokamo na byo bishobora kugira ingaruka ku gihe azamara ku isi.

Ubushakashatsi bwakozwe n’Ikigo cy’Igihugu cy’Ibarurishamibare mu Bufaransa (Institut National de la Statistique et des Études Économiques (INSEE) bwagaragaje ko icyizere cyo kubaho kugeza ku myaka 100 gishoboka kuko muri iki gihugu mu bantu 594,000 bapfuye mu 2016 abagera kuri 21,000 bari bayigejeje.




Chief Editor

Writer and Editor at IwacuMag.

Yisangize abandi:

Ibitekerezo byatanzwe:

Chief Editor

Chief Editor

Writer and Editor at IwacuMag.